Home >> More>>Gadgets & Social Media
ભણતરની સાથે બાળકોને મા-બાપ અસુરક્ષિત સ્પર્શનું જ્ઞાન પણ આપે
Source :     |  Last Updated: 2017-12-21 21:19:45

માણસની વિકૃતિની પરાકાષ્ટા કઈ હદ સુધી પહોંચી શકે તેની કલ્પના કરવી મુશ્કેલ છે. થોડાક સમયથી બાળકો સાથે થતા શારીરિક શોષણના કિસ્સાઓ વધી રહ્યા છે. મોટાભાગે આ કિસ્સાઓમાં સ્કૂલ, પાડોશી અથવા પરિવારની જ કોઈ વ્યક્તિની સંડોવણી જોવા મળતી હોય છે.  આવી ઘટનાઓ બાળકના મન અને મસ્તિષ્ક ઉપર ઊંડી અસર કરતા હોય છે. તેથી મા-બાપે યોગ્ય ઉંમરે બાળકોને ભણતરની સાથે અસુરક્ષિત સ્પર્શનું જ્ઞાન આપવું જરૂરી છે. વાસ્તવમાં આવી ઘટનાઓની શરૂઆત અસુરક્ષિત સ્પર્શથી જ શરૂ થતી હોય છે. બાળકો તે સ્પર્શને પહેલેથી ઓળખી કાઢે તો શારીરિક શોષણની ઘટનાઓ બનતી અટકી શકે છે.

થોડા સમય અગાઉ જામનગરના અંતરિયાળ વિસ્તારમાં રહેતી ચાર વર્ષીય બાળકી ઉપર ૨૭ વર્ષના નરાધમે બળાત્કાર ગુજાર્યો હતો. આ કોઈ અજાણી વ્યક્તિ નહોતી, પણ બાજુના મહોલ્લામાં રહેતો ઓળખીતો શખ્સ હતો. એ જ રીતે સોલા વિસ્તારમાં પણ મજૂરની પાંચ વર્ષીય બાળકીને ૩૦ વર્ષીય ચોકીદાર ફોસલાવીને ઝાડીઓમાં લઈ ગયો હતો અને તેની સાથે બળાત્કાર ગુજાર્યો હતો. નિકોલમાં પણ ૧૧ વર્ષીય બાળક સાથે પાડોશમાં રહેતી મોટી ઉંમરની વ્યક્તિએ એકલતાનો લાભ લઈ સૃષ્ટિ વિરૂદ્ધનું કાર્ય કર્યું હતું. ઉપરોક્ત ત્રણેય કિસ્સા પોલીસ કેસ થવાના કારણે બહાર આવ્યા હતા, પરંતુ આવા અનેક કિસ્સાઓ બદનામીના ડરથી બહાર આવતા નથી તે પણ હકીકત છે.

સિવિલના પિડિયાટ્રિક સર્જરી વિભાગના વડા ડૉ. રાકેશ જોષી કહે છે કે, આવી પરિસ્થિતિમાં બાળકોને ફિઝિકલ કરતા મેન્ટલી ટ્રોમા વધારે હોય છે. ભોગ બનીને આવતા બાળકોની સ્થિતિ અતિ ગંભીર હોય છે. તેમના આંતર અંગોની સર્જરી કરવી ઘણી વખત ડૉક્ટર્સ માટે મુશ્કેલ હોય છે. સિવિલના સુપરિન્ટેન્ડન્ટ ડૉ. એમ.એમ.પ્રભાકર કહે છે કે, મોટા ભાગે આવા કિસ્સાઓમાં ફરિયાદ થતી નથી. જે બાળકો આવી ઘટનાના શિકાર બને છે તેમનો સ્વભાવ ચીડચીડો બને છે. આવા બાળકોને ચોક્કસ લોકો માટે ઘૃણા ઉત્પન્ન થતી હોય છે. મા-બાપે તે માટે કાળજી રાખવી જોઈએ.

બાળકોને સમજાવો

હોઠ, છાતીનો ભાગ, બે પગ વચ્ચેનો ભાગ અને શરીરનો પાછળનો ભાગ જ્યાં માતા અથવા પિતાને બાદ કરતા કોઈ પણ વ્યક્તિને ત્યાં સ્પર્શ કરવાનો અધિકાર નથી. પાંચ વર્ષ કરતા મોટી ઉંમરના બાળકોને ઈરાદાપૂર્વકના સ્પર્શ અંગે મા-બાપે સમજાવવું જરૂરી છે. આવી સ્થિતિમાં મોટેમોટેથી બૂમો પાડવી અથવા ભાગી જવું તેવી પણ સમજણ આપવી જોઈએ.


Keywords : mayuri,monika,sonal